Sri Ganapati Atharvashirsha--శ్రీ గణపత్యథర్వశీర్ష

ఓం భద్రం కర్ణేభిః శృణుయామ దేవా ।

భద్రం పశ్యేమాక్షభిర్యజత్రాః ॥

స్థిరైరఙ్గైస్తుష్టువాంసస్తనూభిః ।
వ్యశేమ దేవహితం యదాయుః ॥

ఓం స్వస్తి న ఇన్ద్రో వృద్ధశ్రవాః ।
స్వస్తి నః పూషా విశ్వవేదాః ॥

స్వస్తినస్తార్క్ష్యో అరిష్టనేమిః ।
స్వస్తి నో బృహస్పతిర్దధాతు ॥

ఓం శాంతిః । శాంతిః ॥ శాంతిః॥।

॥ ఉపనిషత్ ॥

ఓం లం నమస్తే గణపతయే ॥
త్వమేవ ప్రత్యక్షం తత్త్వమసి ॥ త్వమేవ కేవలం కర్తాఽసి ॥
త్వమేవ కేవలం ధర్తాఽసి ॥ త్వమేవ కేవలం హర్తాఽసి ॥
త్వమేవ సర్వం ఖల్విదం బ్రహ్మాసి ॥
త్వం సాక్షాదాత్మాఽసి నిత్యమ్ ॥ ౧॥

॥ స్వరూప తత్త్వ ॥

ఋతం వచ్మి (వదిష్యామి) ॥ సత్యం వచ్మి (వదిష్యామి) ॥ ౨॥
అవ త్వం మామ్ ॥ అవ వక్తారమ్ ॥ అవ శ్రోతారమ్ ॥
అవ దాతారమ్ ॥ అవ ధాతారమ్ ॥
అవానూచానమవ శిష్యమ్ ॥
అవ పశ్చాత్తాత్ ॥ అవ పురస్తాత్ ॥
అవోత్తరాత్తాత్ ॥ అవ దక్షిణాత్తాత్ ॥
అవ చోర్ధ్వాత్తాత్ ॥ అవాధరాత్తాత్ ॥
సర్వతో మాం పాహి పాహి సమంతాత్ ॥ ౩॥
త్వం వాఙ్మయస్త్వం చిన్మయః ॥
త్వమానందమయస్త్వం బ్రహ్మమయః ॥
త్వం సచ్చిదానందాద్వితీయోఽసి ॥
త్వం ప్రత్యక్షం బ్రహ్మాసి ॥
త్వం జ్ఞానమయో విజ్ఞానమయోఽసి ॥ ౪॥
సర్వం జగదిదం త్వత్తో జాయతే ॥
సర్వం జగదిదం త్వత్తస్తిష్ఠతి ॥
సర్వం జగదిదం త్వయి లయమేష్యతి ॥
సర్వం జగదిదం త్వయి ప్రత్యేతి ॥
త్వం భూమిరాపోఽనలోఽనిలో నభః ॥
త్వం చత్వారి వాక్పదాని ॥ ౫॥
త్వం గుణత్రయాతీతః త్వమవస్థాత్రయాతీతః ॥
త్వం దేహత్రయాతీతః ॥ త్వం కాలత్రయాతీతః ॥
త్వం మూలాధారస్థితోఽసి నిత్యమ్ ॥
త్వం శక్తిత్రయాత్మకః ॥
త్వాం యోగినో ధ్యాయంతి నిత్యమ్ ॥
త్వం బ్రహ్మా త్వం విష్ణుస్త్వం రుద్రస్త్వం ఇన్ద్రస్త్వం అగ్నిస్త్వం వాయుస్త్వం సూర్యస్త్వం చంద్రమాస్త్వం బ్రహ్మభూర్భువఃస్వరోమ్ ॥ ౬॥

॥ గణేశ మంత్ర ॥

గణాదిం పూర్వముచ్చార్య వర్ణాదిం తదనంతరమ్ ॥
అనుస్వారః పరతరః ॥ అర్ధేన్దులసితమ్ ॥ తారేణ ఋద్ధమ్ ॥
ఏతత్తవ మనుస్వరూపమ్ ॥ గకారః పూర్వరూపమ్ ॥
అకారో మధ్యమరూపమ్ ॥ అనుస్వారశ్చాన్త్యరూపమ్ ॥
బిన్దురుత్తరరూపమ్ ॥ నాదః సంధానమ్ ॥
సంహితాసంధిః ॥ సైషా గణేశవిద్యా ॥
గణకఋషిః ॥ నిచృద్గాయత్రీచ్ఛందః ॥
గణపతిర్దేవతా ॥
ఓం గం గణపతయే నమః ॥ ౭॥

॥ గణేశ గాయత్రీ ॥

ఏకదంతాయ విద్మహే । వక్రతుణ్డాయ ధీమహి ॥
తన్నో దంతిః ప్రచోదయాత్ ॥ ౮॥

॥ గణేశ రూప ॥

ఏకదంతం చతుర్హస్తం పాశమంకుశధారిణమ్ ॥
రదం చ వరదం హస్తైర్బిభ్రాణం మూషకధ్వజమ్ ॥
రక్తం లంబోదరం శూర్పకర్ణకం రక్తవాససమ్ ॥
రక్తగంధానులిప్తాంగం రక్తపుష్పైః సుపూజితమ్ ॥
భక్తానుకంపినం దేవం జగత్కారణమచ్యుతమ్ ॥
ఆవిర్భూతం చ సృష్ట్యాదౌ ప్రకృతేః పురుషాత్పరమ్ ॥
ఏవం ధ్యాయతి యో నిత్యం స యోగీ యోగినాం వరః ॥ ౯॥

॥ అష్ట నామ గణపతి ॥

నమో వ్రాతపతయే । నమో గణపతయే । నమః ప్రమథపతయే ।
నమస్తేఽస్తు లంబోదరాయైకదంతాయ ।
విఘ్ననాశినే శివసుతాయ । శ్రీవరదమూర్తయే నమో నమః ॥ ౧౦॥

॥ ఫలశ్రుతి ॥

ఏతదథర్వశీర్షం యోఽధీతే ॥ స బ్రహ్మభూయాయ కల్పతే ॥
స సర్వతః సుఖమేధతే ॥ స సర్వ విఘ్నైర్నబాధ్యతే ॥
స పంచమహాపాపాత్ప్రముచ్యతే ॥
సాయమధీయానో దివసకృతం పాపం నాశయతి ॥
ప్రాతరధీయానో రాత్రికృతం పాపం నాశయతి ॥
సాయంప్రాతః ప్రయుంజానో అపాపో భవతి ॥
సర్వత్రాధీయానోఽపవిఘ్నో భవతి ॥
ధర్మార్థకామమోక్షం చ విందతి ॥
ఇదమథర్వశీర్షమశిష్యాయ న దేయమ్ ॥
యో యది మోహాద్దాస్యతి స పాపీయాన్ భవతి
సహస్రావర్తనాత్ యం యం కామమధీతే
తం తమనేన సాధయేత్ ॥ ౧౧॥
అనేన గణపతిమభిషించతి స వాగ్మీ భవతి ॥
చతుర్థ్యామనశ్నన్ జపతి స విద్యావాన్ భవతి ।
స యశోవాన్ భవతి ॥
ఇత్యథర్వణవాక్యమ్ ॥ బ్రహ్మాద్యాచరణం విద్యాత్
న బిభేతి కదాచనేతి ॥ ౧౨॥
యో దూర్వాంకురైర్యజతి స వైశ్రవణోపమో భవతి ॥
యో లాజైర్యజతి స యశోవాన్ భవతి ॥
స మేధావాన్ భవతి ॥
యో మోదకసహస్రేణ యజతి స వాఞ్ఛితఫలమవాప్నోతి ॥
యః సాజ్యసమిద్భిర్యజతి స సర్వం లభతే స సర్వం లభతే ॥ ౧౩॥
అష్టౌ బ్రాహ్మణాన్ సమ్యగ్గ్రాహయిత్వా సూర్యవర్చస్వీ భవతి ॥
సూర్యగ్రహే మహానద్యాం ప్రతిమాసంనిధౌ వా జప్త్వా సిద్ధమంత్రో భవతి ॥
మహావిఘ్నాత్ప్రముచ్యతే ॥
మహాదోషాత్ప్రముచ్యతే ॥
మహాపాపాత్ ప్రముచ్యతే ॥
స సర్వవిద్భవతి స సర్వవిద్భవతి ॥
య ఏవం వేద ఇత్యుపనిషత్ ॥ ౧౪॥

॥ శాన్తి మంత్ర ॥

ఓం సహనావవతు ॥ సహనౌభునక్తు ॥
సహ వీర్యం కరవావహై ॥
తేజస్వినావధీతమస్తు మా విద్విషావహై ॥
ఓం శాంతిః । శాంతిః ॥ శాంతిః ॥।
॥ ఇతి శ్రీగణపత్యథర్వశీర్షం సమాప్తమ్ ॥